കാറ്റ്
____
ഈ കാറ്റിനെന്തൊരു കുറുമ്പാണ്‌
ജാലക വിരി നീക്കി
എത്ര നേരമായെന്നെ തഴുകുന്നു..
കാതുകളില്‍ നേര്‍ത്തൊരീണത്തില്‍
കുഴലൂതുന്നു..
മിഴിയടച്ച് മനസ്സുണര്‍ന്നുള്ള
എന്റെ കിടപ്പവള്‍ക്ക്
രസിച്ചിട്ടുണ്ടാവും,
ചിലവേള
കണ്ണീരുറഞ്ഞയീ മിഴിക്കടലില്‍
നീന്തി തളര്‍ന്നു കാണും,
അതോ .
ഉള്ളിലുയിര്‍ പൊട്ടിയ
കൊടുങ്കാറ്റിനെ തിരിച്ചറിഞ്ഞിട്ടോ?
അല്ലെങ്കിലും
മനുഷ്യനെക്കാളെത്ര വേഗം
നമ്മെ കാറ്ററിയുന്നു
മൃദു സ്പര്‍ശമായ്
കൂടെയുണ്ട്
അകത്തും
പുറത്തുമെന്നോര്‍മ്മിപ്പിച്ച്,
ഉപാധികളില്ലാതെ
സ്നേഹിച്ച്..............
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ