നീലാംബരി

ലാസ്റ്റ് പിരീഡ്
__________
ചങ്കിലെ ചെന്തീയില്‍ മുക്കി 
ഓര്‍മ്മത്താളുകളില്‍
സ്നേഹ മധു പുരട്ടുന്നുണ്ട്
കൌമാര ശലഭങ്ങള്‍

കാഴ്ചകള്‍ കത്തുന്ന
മാര്‍ച്ചിലെ പകലുകള്‍ക്ക്‌
കണ്ണീരിന്റെ ഉപ്പുരസം

പ്രണയവും വിരഹവും
പേടിയും പരവേശവും
ചിരിയും നൊമ്പരവും
തിങ്ങി നിറഞ്ഞ ചൂടനുച്ചകള്‍

തട്ടം കൊണ്ട് കണ്ണ് തുടച്ച്
തൊട്ടടുത്തിരിയ്ക്കുന്ന മനുവിനെ
വീര്‍പ്പു മുട്ടിക്കുകയാണ്
'പത്ത്' ബിയിലെ 'വേളൂരി' നസീമ

ലോ വേസ്റ്റ് പാന്റ്സ്
ഒന്ന് കൂടി ഊര്‍ത്തി
കണ്ണിറുക്കി വരുന്നുണ്ട്
പ്രണയത്തിന്റെ ഉസ്താദ്
ഒമ്പതില്‍ രണ്ടു വട്ടം മൊട്ടയിട്ട
സുജിത് കുമാര്‍

സ്പൈക്കന്‍ മുടി
കൈ വിരലാല്‍ കൂര്‍പ്പിച്ച്
എനിക്കിതൊക്കെ പുല്ലാണെന്ന
മട്ടിലാണ് സ്കൂള്‍ ലീഡര്‍ റാഷിദ്

കോമ്പസ് കൊണ്ട്
കാലൊടിയന്‍ ഡെസ്ക്കില്‍
ഓര്‍മ്മപ്പേരുകള്‍ കൊത്തി വെക്കുന്നു
കരവിരുത് 'കാസനോവ'കള്‍

അന്തമില്ലാത്ത പ്രണയത്തെ
അറ്റം കൂര്‍ത്തൊരമ്പാക്കി
ചോന്ന മഷിയില്‍ കട്ടി കൂട്ടി
നെഞ്ചിലെ പ്രണയച്ചൂട്
കടലാസില്‍ പകര്‍ത്തുന്നു
സ്കൂളിലെ റൊമാന്‍സ് ടീം

പണ്ടെഴുതിയ 'ഓള്‍ ദ ബെസ്റ്റും'
'ട്രൈ റ്റു ഗെറ്റ് എ ഹൈ മാര്‍ക്കും'
സുഖമുള്ള നൊമ്പരമാക്കി
മനസ്സിനെ പുറകോട്ടു നടത്തുന്ന
ലാസ്റ്റ് പിരീഡുകള്‍..

(പഠിത്തവും റിവിഷനും വക വെക്കാതെ ഓട്ടോഗ്രാഫ് എഴുതി പ്രണയവും വിരഹവും കണ്ണീരുമായ്
ദിവസങ്ങള്‍ എണ്ണി നീക്കുന്ന പത്താം ക്ലാസിലെ എന്റെ സ്റ്റുഡെന്‍സിന് ഈ വരികള്‍ സമര്‍പ്പിക്കുന്നു)