നീലാംബരി

പങ്കു വെപ്പ്
------------
തുരുമ്പിച്ച ചങ്ങല
ചുരുള്‍ നിവര്‍ന്നത്
നടുമുറ്റത്തെ
തുളസിയുടെ ചോടിളക്കിയാണ്..

ചെമ്പരത്തിയും ചേമന്തിയും
ചെത്തി മാറ്റപ്പെട്ടു..
നടുമുറിയുടെ
മച്ചിന് താഴെയായ്
മരക്കുറ്റിയാഴ്ന്നിറങ്ങി..
വടക്കിനിയും തെക്കിനിയുമെല്ലാം
അളവുകാരന്റെ കൈ വഴക്കത്താല്‍
ചതുരക്കട്ടകളായി..
കുഞ്ഞു കാലിളക്കി
പണ്ടോടി നടന്ന
വരാന്തയുമിടനാഴിയുമെല്ലാം
വെട്ടി നുറുക്കലിന്റെ
നടുക്കടലില്‍..

വല്യേട്ടനും കുഞ്ഞനീത്തീം
തമ്മില്‍ തര്‍ക്കമായി
അവള്‍ക്കു കിട്ടിയ
സ്ഥലത്തിന്റെ മൂലയില്‍
അമ്മയുടെ കുഴിമാടം!
കൂടിയ കാശിനിനിയാ സ്ഥല-
മാരു വാങ്ങും?
ശവമടക്കിയ ഭൂമിക്ക്
വില കുറയുമത്രേ!

കിട്ടിയ പങ്കെല്ലാം കൂട്ടിക്കിഴിച്ച്,
തല്ല് കൂടിയും തര്‍ക്കിച്ചും
അളവുകള്‍ കിറുകൃത്യമാക്കി-
യേട്ടന്‍മാര്‍!!

അള്‍ഷിമേഴ്സിന്റെയഗ്നി ജ്വാലകള്‍
ശൂന്യമാക്കിയ മനസുമായ്
ഈര്‍ക്കില്‍ ശരീരത്തില്‍
പുഞ്ചിരിച്ചും പിറുപിറുത്തും
അഛനെന്റെ തോളില്‍...!!!!!